كلمات اغنية اعجوبة عبدالمجيد عبدالله

كلمات : أنور المشيري
الحان : سلطان السيف

بنتٍ حلاها بْحدِّ ذاته قصيدة
أي شعْر يرضي زينها وْأي مشاعِر
وإذا وِصَفها يا ترى وش جديدة؟!
هذي القمر لو شافها يْصير شاعر

بالإسْم شيخة وْ بالمعاني الحميدة
وبْحسْنها اللي من كثِر ماهو فاخِر
صَعْب ٍيكرّرْه الزِمان وْ يعيده
هالبنت اعجوبة و شرواها نادر

العين عين الرّيم وْ لَفتات جيده
والمَشية في هيبتها لْأرض إتّفاخَر
وْإلى ضْحِكَت كنها الحظوظ السعيدة
ماتدري هذي ضِحكة أو جبْر خاطِر

بنتٍ أرقّ مْن السحابة البعيدة
وْبْوَجهها ضَيِّ الصباح إيتباشَر
من زود ما فيها المَحاسِن فريدة
ممكن تِحَرِّك في الجماد المشاعِر

المدح يرقى بْغيرها وْ هي تزيده
فخامة تِملا النَفْس و تِشرَح خواطِر
إن قلت شيخة كنّي قايل قصيدة
وش عاد لو يبدِع في باقيها شاعر