كلمات اغنية تحريتك بدر بنيدر
كلمات : حاتم البراك
الحان : بدر بنيدر
هلا باللي معه ليل الخميس يقدم التبجيل
هلا باللي قدومه صمت والدنيا تسمّع له
هلا باللي مواعيده فلوسٍ في يدين بخيل
مضيّقها على نفسه وهو ربي موسّع له
هلا بالكوثر اللي برّد الاشواق عقب الويل
ذبح له نارٍ ابطت فالضلوع العوج مشتعله
بعد صبرٍ طويل وسهر ليل وبين عدل وميل
جلبك الحظ الأصبح والطوالع ما توقَّع له
تحرّيتك مثل مايحترون الموقتين السيل
ليا طال الجفاف وجاهم اللي دالجٍ ثعله
انا في وجهك اللي فالدجى يوضي كما القنديل
من الهجر الطويل اللي عيون الشوق تدمع له
حسين الطبع يالحسن الطبيعي ماتبي تجميل
جمالك مع دلالك مثل من قوله على فعله
يليق الك التدلع مثل ما يحلالك التدليل
تدلّع زال تلقى واحدٍ مثلي تدلّع له
تفاصيلك تشكّلها الطبيعة وايّما تشكيل
تبارك من له الاعمال في ذا اليوم ترفع له
الاحجار الكريمة ما تعرف المكحلة والميل
ومصفوف البرد ما ذوّبه جمرٍ مولّع له
نعم عينك زمرّد ، نظرتك تيّار ، رمشك ليل
جبينك بدر ، وجناتك حدايق ، مبسمك شعله
على متنك حريرٍ ناسفه كنّه شليل الخيل
ليا اطلقته يقوم يروح من عودك ويرجع له
يلاعب عود موزٍ حطّه الله في ضفاف النيل
يغذّي له غصونٍ طلعها ماحدٍ بطالع له
