شيلة درب المعنا علي الواهبي الكلمات
كلمات : المعنا
الحان : يوسف الشهري
ايه المعنّا كل مسرى يشوقه
والليل مبدا ونةٍ في خفوقه
يطويه بالمسرى الا زاد شوقه
الليل يحضن حزن قلبه والاشواق
ياملتقى الأشواق ياعذب الأنفاس
الوضع عقب افراقك اليوم حسّاس
مابين مسرى والتفاته وهوجاس
اتعبت قلبٍ للقى دوم مشتاق
يااللي خذاك الوقت .. مشتاق جدّا
شوقٍ على صبر المعنّا تعدّا
اللي يقدّ رهاف الأضلاع قدّا
وانا على وصلك شفوقٍ وسبّاق
((((ياهل الهوى والمحبة لا تلوموني
الوضع من دون خلّي ما يبشّر به
صدّ وجفاني وانا شدت بي ضعوني
حتى العذر والله انّه ماتعذّر به))))
ياعين حرٍّ في علوّ النوايف
حوّل على الصيدة ولاهوب خايف
وادمى بقلبٍ في الضلوع النحايف
وعوّد بجنحانه على الرجم خفّاق
وصف الشهد بين الشفايا مصفّا
من الحيا وبكل عفّة تخفّا
صدك عن المشتاق كفّا ووفّا
ترى المحبّة بين عهدٍ وميثاق
خليتني للحزن قاعد لحالي
ليلي هجدني بالحزن مايمالي
الليل من فرقاك يسوى ليالي
سيف السهر جرّح من الهجر الاحداق
ارجع ترى الفرقى جريمة جريمة
يااللي وصايفك العديمة عديمة
الفرحة الفرحة قديمة قديمة
القلب طيرٍ للمواصيل توّاق
ارجع ولا ترجع رجوع المجامل
خلك على وصل المحبين صامل
اترك حقوق آداب حسن التعامل
تعليقة المشتاق ماهيب تنطاق
ولا فخلّ القلب يسلا ويدله
مبطي حقوق الوسم ماقد صفتله
عساه يسترجع مع الوقت عقله
يجمع شتاته عقب تقطيع الارزاق
نهاية القصة ودرب المعنّا
ردّ الخبر ياسامع الصوت عنّا
ماكلّ من غنّا من الوجد غنّا
النّاس مختلفة مجالات واذواق
